أكياس من أجل البيئة

صورة لكيس بلاستيكي قابل للتحلل، تستخدمه شركة التوصيل "طلبات"

الأكياس البلاستيك اللي أصبحت ملمح ضروري من ملامح حياتنا العصرية، هي عبارة عن كارثة بيئية في بيت كل واحد منا، الكيس اللي بناخده من السوبر ماركت، أو محل الملابس، أو بنتخلص فيه من القمامة بتاعتنا، مليانة كم كبير من مادة الرصاص وده لأنها مصنعة من مواد نفطية في الأساس، وغير قابلة للتحلل العضوي، يعني ممكن الكيس يحتاج فترة تصل ل ١٠٠٠ سنة ليتحلل عضويا، وبالتالي علشان نتخلص منها بتضطر مكبات النفايات لحرقها، وده بيسبب تلوث عنيف للهواء والمياه. ده بجانب إن الأكياس البلاستيكية اللي بنشوفها واحنا في المصايف جوه المية، بتقتل حرفيا الكائنات البحرية (١٠٠ ألف كائن بحري كبير زي الحيتان والسلاحف بيموتوا من الأكياس البلاستيكية سنويا). ده بجانب إن كل ٣ كيلو سمك موجودين في البحار والمحيطات، قصادهم حاليا ١ كيلو قمامة، وبحلول ٢٠٥٠ هاتبقى القمامة اللي في البحر أكثر من السمك.

بعض الدول حظرت استخدام الأكياس البلاستيكية تماما (زي الدانمارك وكينيا)، عندنا في مصر فيه مبادرات حكومية وغير حكومية لمنع واستبدال الأكياس البلاستيكية، وكتير من السوبر ماركت الكبيرة أصبحت توفر حقائب قماشية قابلة لإعادة الاستخدام بحيث لا يضطر العميل لاستخدام الكيس البلاستيكي.

مؤخرا، وجدت إن "طلبات" بتوصل بعض الأغراض (زي البقالة groceries) في أكياس قابلة للتحلل bio-degradable، ودي أكياس صديقة للبيئة وبتتحلل تلقائيا بعد ٦ شهور تقريبا من تاريخ الانتاج، غير إنه مكتوب عليها بالعربي والانجليزي عبارات تشجع على إعادة استخدامها وتدويرها. ودي مشاركة عظيمة من طلبات واستثمار عظيم منها في التوعية بالحفاظ على البيئة. أعتقد إن المشاركات والأفعال الصغيرة دي، ليها أثر متراكم، وممكن في يوم من الأيام تنقذنا كلنا وتنقذ ولادنا من مشكلات ممكن منكونش حاسين بيها. شكرا "طلبات" جدا .